Өйдөбүнньүк бэлиэлэр турдулар
Баатаҕай нэһилиэгэ Улуу Кыайыы үбүлүөйдээх 80 сылыгар араас хабааннаах үлэлэри ыытар. Кырыктаах кыргыһыыга, уоттаах сэриигэ Баатаҕай нэһилиэгиттэн барыта 142 киһи ыҥырыллан барбыта.
Ыам ыйын 5, 6 күннэригэр хорсун буойуттар, тыыл үлэһиттэрин үтүө ааттарын үйэтитиигэ, кинилэр олорбут дьиэлэригэр мемориальнай дуоскалар арылыннылар. Ол курдук, сэрии кыттыылааҕа, Аҕа дойду сэриитин Албан Аат уордьан III ст. кавалера, норуот ырыаһыта, импровизатор тойуксут Семен Дмитриевич Ушницкайга, "Хорсунун иһин", "Японияны кыайыы иһин" мэтээллэрдээх Петр Иҥнатьевич Готовцевка, кини кэргэнигэр элбэх оҕолоох ийэҕэ, тыыл ветераныгар Мария Ивановна Ушницкаяҕа, тыыл хорсун үлэһиттэригэр кэргэннии Петр Егорович Нафанаиловка, Екатерина Семеновна Сивцеваҕа, сэрии кыттыылааҕа, буойун учуутал, РСФСР үөрэҕириитин туйгуна Петр Павлович Алексеевка, сэрии кыттыылааҕа, 7 төгүл нэһилиэк Сэбиэтин депутатынан үлэлээбит, Кыайыы үбүлүөйүнэй мэтээллэрдээх Николай Алексеевич Бурнашевка, кини кэргэнигэр тыыл, үлэ ветерана Марфа Иннокентьевна Константиноваҕа, сэрии кыттыылааҕа, "Германияны кыайыы иһин" мэтээллээх, сылгыһыт Иннокентий Егорович Олесовка, кини кэргэнигэр тыыл, үлэ ветерана Мария Лукинична Олесоваҕа бэлиэлэр турдулар.
Тэрээһиҥҥэ нэһилиэк салалтата, тэрилтэ салайааччылара, ветераннар оҕолоро, сиэннэрэ, аймахтара, оскуола үөрэнээччилэрэ, олохтоохтор көхтөөх кыттыыны ыллылар. Кэнчээри ыччат өйдүүрүгэр, саныы, махтана сылдьарыгар бу үйэтититии үлэлэрэ ыытыллаллар. Ылбаҕай ырыаларынан, хомоҕой хоһооннорунан Н.Н. Тарскай аатынан Баатаҕай орто оскуолатын үөрэнээччилэрэ, "Уолан" бөлөх уолаттара, "Күнчээн" уһуйаан иитиллээччитэ Баир Самсонов киэргэттилэр. Бу бачыым салгыы, сыл устатын тухары, бэлиэ күннэринэн ыытыллара былааннанар.