Баатаҕайга "Өйдөбүнньүк чүмэчи" акция
Ыам ыйын 8 күнүгэр киэһэ 9 чаас 30 мүнүүтэҕэ нэһилиэкпит олохтоохторо, ытыктабыллаах сэрии кэмин оҕолоро, үлэ ветераннара, кэнчээри ыччаттара, Кыайыы болуоссатыгар муһуннулар. Аҕа дойду Улуу сэриитигэр баран сырдык тыыннарын толук уурбут буойуттарга, сэрии ветераннарыгар, үлэ фронун кыттыылаахтарыгар, тыылга үлэлээбит ытык дьоммутугар Улуу Кыайыы 80 сылыгар аналлаах кэриэстэбил “Өйдөбүнньүк чүмэчи” акцияҕа кыттыстыбыт.
Нэһилиэк дьаһалтатын баһылыга Белолюбскай М.М. кэриэстэбил ахтыы оҥордо, историк учуутал Готовцева А.Е. Аҕа дойду сэриитэ дойдубут историятыгар бэлиэ миэстэни ыларын туһунан, библиотекарь Пермякова А.П. нэһилиэкпит Аҕа дойду сэриитигэр кыттыытын туһунан билиһиннэрдилэр.
Н.Н. Тарскай аатынан Баатаҕай орто оскуолатын үөрэнээччилэрэ, ветеран учуутал Готовцева С.Д. Кыайыы күнүн көрсө ыытыллыбыт хоһоон айыытын күрэҕэр кыттыбыт дьон айымньыларын аахтылар, "Сырдык Аартык" ыччат түмсүүтүн кыргыттара монтаһынан, Кыайыы ырыатынан, үҥкүүтүнэн кытыннылар. Биһиги эйэлээх олохпут иһин тыыннарын толук уурбут хорсун буойуттарбыт сырдык ааттарын ытыктаан кириэстэбил чүмэчи уурдубут.
