Улуу Кыайыы 80 сыллаах бырааһынньыга
Ыам ыйын 9 күнүгэр нэһилиэкпитигэр Кыайыы күнүн үрдүк таһымнаахтык бэлиэтээтибит. Хаһааҥҥытааҕар да бүгүҥҥү күҥҥэ сайыҥҥылыы чаҕылхай күннээх, ыраас халлааннаах күн турда. Дьон-сэргэ, оҕо-уруу тоҕуоруһа мустан, өрө көтөҕүллэн Улуу Кыайыы 80 сылын көрсө Кыайыыны уһансыбыт буойуттарбытыгар махтанан, сүгүрүйэн Кыайыы парада буолла.
Парад кэннэ биир дойдулаах буойуттарбытыгар, холобура суох хорсун быһыыларыгар сүгүрүйэ, махтана бөһүөлэк олохтоохторо Кыайыы болуоссатыгар муһуннулар. Кэриэстэбил миитинигэр нэһилиэкпит баһылыга Михаил Белолюбскай эҕэрдэ тылын анаан, сэрии сылын оҕолоругар кыайыы үбүлүөйүнэй мэтээлин, эҕэрдэ суруктары, бэлэхтэри туттарда. Билиҥҥи туругунан нэһилиэкпитигэр сэрии сылын оҕолоро 7-лэр, олортон өрөгөйдөөх күн 5 ветеран кыттыыны ылла. Улуу Кыайыы чиэһигэр байыаннай ырыалаах, хоһоонноох, "Кыайыы вальса" үҥкүүлээх, хонуу куукуналаах тэрээһин буолла.
Тэрээһин иккис чааһыгар орто оскуола үөрэнээччилэрин икки ардыларыгар «Зарница» күрэх ыытылынна. «Хотойдор», «Урааҥхайдар», «Мохсоҕоллор» хамаандалара кыратыттан, улаханыгар тиийэ илин-кэлин түһүстүлэр. Ыһыылаах-хаһыылаах күрэх түмүгүнэн «Урааҥхайдар» хамаанда эрэллээхтик бастаата, «Хотойдор» иккис миэстэ, «Мохсоҕоллор» үһүс миэстэ.
Үөрэнээччилэр күрэхтэрин кэннэ, нэһилиэк олохтоохторугар ыытыллыбыт тиэргэн киэргэтиитин, тэрилтэлэр икки ардыларыгар - техника киэргэтиитин уонна олохтоох библиотека көҕүлээбит "Кыайыы дьыктаана" акция түмүгүн иһитиннэрдилэр. Дьыктааны үгүс киһи сэҥээрбит, ол эрээри толору эппиэт биэрэн кыттыбыт 8 киһи кытынна. Түмүккэ 1 м. ылары ситистэ - Готовцева А.Е., 2 м. - Готовцева Н.В., 3 м. - Готовцева Л.Р. Кинилэр сэмэй бириистэринэн наҕараадаланнылар, кыттыбыттарга туоһу суруктар туттарылыннылар.
Бу күнү уруйдаабыттыы айылҕабыт барахсан чэлгийэ сырдаабыт. Сылаас күн чаҕылхай сардаҥалара, Кыайыы салютун курдук, күлүмнүү умайан, үөрүүбүтүн үксэттэ. Бу курдук, биир ситими тутуһан, кыайыылаахтык үлэлээн-хамсаан, нэһилиэкпитин өрө тардыаҕыҥ!