Историк-ученай Д.Д. Петровка аналлаах ахтыы түһүлгэтэ
Кыайыы 80 сылыгар, бэс ыйын 3 күнүгэр СӨ Национальнай библиотекатын историческай саалатыгар биир дойдулаахпыт, историческай наука кандидата Д. Д. Петров үтүө аатыгар ахтыы түһүлгэтэ тэрилиннэ. Манна ыраахтан-чугастан киһи бөҕө мустубут, ыҥырыллыбыт. Кэргэнин Евдокия Адамовна Скрябина дойдутуттан Хаҥалас улууһун Нөмүгү нэһилиэгиттэн, биир дойдулаахтара Уус Алдантан, төрөөбүт түөлбэтиттэн Баатаҕайтан, үс Герой аатын тилиннэрбит Бүлүү улууһуттан, уолаттарын Анатолий, Панкратий, Юрий алтыспыт доҕотторо, коллегалара, аймахтара, сиэннэрэ кыттыыны ыллылар.
Тэрээһини СӨ Правительствотын Быраап аакталарын таҥар уонна таһаарар управлениетын салайааччыта Римма Романовна Жиркова иилээн-саҕалаан ыытта. Түһүлгэни алгыһынан, хомус дьүрүскэнинэн астылар, ыалдьыттарга сэмэй остуол тартылар. Саала ортотугар Д.Д
Петров олоҕун, үлэтин кэпсиир, билиһиннэрэр кинигэлэр, бэйэтин суруйуулара, Баатаҕай оскуолатын музейын фондатыттан ученай папката, үбүлүөйдээх сылларга ыытыллыбыт үлэлэри кэпсиир папкалар быыстапкаҕа турдулар. Саха норуотун маҥнайгы композитора Адам Скрябин маршыттан, кинилэр дойдуларыттан ахтыы түһүлгэтэ саҕаланна.
Петровтар дьиэ кэргэн тула истиҥ сэһэргэһии, аҕаларын, эһэлэрин Дмитрий Дмитриевич аатын үйэтитиигэ кылгас иһитиннэриилэри, ыытыллыбыт үлэлэри, санаалары иһиттибит. С.С. Васильев - Борогонскай суруйбут "Ильмень күөл" балладатын, Д.Д. Петров сөбүлээн ыллаабыт, И.Д. Винокуров - Чаҕылҕан "Хайыһар" ырыатын уйадыйа сэҥээрдибит.
Историк ученай Д.Д. Петров оҕолоруттан икки кыыс Светлана уонна Евдокия хааллылар. Кыргыттар убайдарын суолларын салҕаан, аҕаларын аатын үйэтитиигэ үлэлэһэллэригэр махтанан туран "Баатаҕай нэһилиэгэ" тыа сирин түөлбэтин, дьонун-сэргэтин ааттарыттан сэмэй бэлэхпитин туттардыбыт. Тэрээһин сиэннэр уонна оҕолор махталлаах тылларынан түмүктэннэ.
