"Өбүгэлэрбит суолларынан" быыстапка аһылынна

Бу дьыл бэс ыйын 18 күнүгэр Дьокуускай куорат Ем. Ярлославская аатынан история уонна хотугу норуоттар култуураларын холбоһуктаах түмэлигэр кыраайы үөрэтээччи, фольклорист Иван Георгиевич Березкиҥҥа аналлаах быыстапка аһылынна.

Быыстапкаҕа ыраахтан-чугастан аймахтара, биир дойдулаахтара, бииргэ үлэлээбит коллегалара кэлбиттэр. Түмэл үлэһитэ В.В. Попов көҕүлээн, тэрийэн бэрт сэргэх уонна ураты тэрээһин буолла. Иван Георгиевич олоҕун устата үлэлээбит үлэтэ чаҕылхайдык бу быыстапкаҕа көһүннэ. Кини араас экспедицияларга булбут экспонаттара, саха былыргы историятын суруйууга үлэлэспит кинигэлэрэ, ханна да сырдатылла илик суруйуулара, кини туһунан хаартыскалар, тус докумуоннара, тутта сылдьыбыт маллара астыктык арыллан көһүннүлэр. Бу быыстапкаҕа түмэл эрэ матырыйааллара буолбакка, СӨ Национальнай, дойдутун Баатаҕай библиотекаларын фондаларыттан холбоһуктаах матырыйааллар турдулар. Быыстапка балаҕан ыйыгар диэри туруоҕа.