"Күнчээн" уһуйаан 65 сылыгар кинигэ сүрэхтэннэ
Күн бэҕэһээ, ахсынньы 22 күнүгэр Баатаҕай нэһилиэгэр "Күнчээн" оҕо уһуйаана тэриллибитэ 65 сылыгар "Ааспыт кэм ахтылҕана, кэлэр кэм кэскилэ" кинигэ биһирэмэ буолан ааста. Кинигэ уһуйаан устуоруйатын, үлэлээбит ветераннары, билигин үлэлии-хамсыы сылдьар коллективы, инники тосхоллорун, сэмэй ситиһиилэрин, хаартысканан кэм кэрдиистэрин сырдатар.
Тэрээһиҥҥэ уһуйаан сэбиэдиссэйэ Босикова Т.И., нэһилиэк баһылыга Белолюбскай М. М., улуустааҕы үөрэх салалтатын салайааччытын солбуйааччы Григорьев Т.А., үөрэх үлэһиттэрин идэлээх сойууһун кэмитиэтин бэрэссэдээтэлэ, уһуйаан выпускнига Готовцев Н.Н., уһуйаан ветереннара Бурнашева У.И., Готовцева А.П., Готовцева О.А., Березкина А.Н., улуус уһуйааннарын сэбиэдиссэйдэрэ, нэһилиэк тэрилтэлэрэ, выпускниктар истиҥ эҕэрдэлэрин, бэлэхтэрин, туһааннаахтарга үрдүк наҕараадалары туттартаатылар.
Үөрүүлээх түһүлгэҕэ уһуйаан выпускниктара Суорун Омоллоон аатынан опера уонна балет театрын артыыһа Леонид Готовцев, Н. Н. Тарскай аатынан Баатаҕай орто оскуолатын 1 кылааһын үөрэнээччилэрэ Арина Готовцева, Айтал Белолюбскай ылбаҕай ырыаларын уонна 5 кылаас коллектива олоҥхолоон иһитиннэрдилэр, киэргэттилэр.
Үгүс сыллар тухары элбэх оҕону ииппит тапталлаах уһуйааммыт ситиһиитэ үрдээн истиҥ, суола-ииһэ кэҥээтин, кэлэр кэскил биһиктэннин диэн алгыспытын аныыбыт.
