Култуура сыла арылынна!
Бу дьыл олунньу 5 күнүгэр улууспут киинигэр култуура эйгэтин үлэһиттэрин дьоро күнэ буолан ааста. Ол курдук, Култуура сылын үөрүүлээхтик арыйыы, ааспыт сыл түмүгүнэн култуура бастыҥнарын чиэстиир үөрүүлээх тэрээһин тэрилиннэ. Бу дьоро күн бастаҥы аҥара - култуура үлэһиттэригэр Уус Алдан улууһа төрүттэммитэ 100 сылын көрсө ыытыллар үлэ былааннарын тула сүбэ мунньаҕынан саҕаланна. Мунньаҕы улуус баһылыгын сүбэһитэ Иван Колодезников, социальнай эйгэҕэ солбуйааччы Григорий Аргунов, улуус култуураҕа управлениетын начаалынньыга Эльза Киренская иилээн-саҕалаан ыыттылар.
Күн иккис аҥарыгар - "Күн Эйгэ" 2025 сыл түмүгүнэн улууспут култууратын бастыҥ үлэһиттэрин чиэстээтилэр. Ол курдук, М.К. Федорова аатынан Баатаҕай нэһилиэгин библиотекатын сэбиэдиссэйэ Августина Петровна Пермякова, С.С. Аржаков аатынан Бээрийэ нэһилиэгин библиотекатын сэбиэдиссэйэ Туяра Антоновна Никифорова "Бастыҥ култуура үлэһитэ" ааты ыллылар. Маны таһынан, СӨ Бырабыытылыстыбатын Махтал суругунан С.С. Васильев- Борогонскай аатынан киин библиотека куйаар нөҥүө үлэлиир отделын сэбиэдиссэйэ Роза Константиновна Колодезникова, СӨ култуура үлэһиттэрин идэлээх Сойууһун Бочуоттаах Грамотатынан Хоноҕор библиотекатын техническай үлэһитэ Никитина Мотрена Ивановна наҕараадаланнылар. Биир идэлээхтэрбитин истиҥник эҕэрдэлиибит!
