Баатаҕай оскуолатыгар наука күнэ
Олунньу 6 күнүгэр Россияҕа Наука күнүн чэрчитинэн Баатаҕай орто оскуолатын иһинэн "Наукаҕа хардыы" научно-практическай конференция ыытылынна. Конференцияны арыйар үөрүүлээх чааска оскуола директора Бурнашева А.А. Наука күнүн историятын билиһиннэрдэ, директоры иитэр үлэҕэ солбуйааччы Готовцева Я.Ю., директор иитэр үлэҕэ сүбэһитэ Сидорова Н.Н., оҕо хамсааһынын салайааччыта Матвеева А.И., олохтоох библиотека сэбиэдиссэйэ Пермякова А.П. нэһилиэктэн тахсыбыт ученайдары, кинилэр үлэлэрин сырдаттылар.
Ол кэннэ научно-практическай конференцияҕа билим эйгэтигэр маҥнайгы хардыыларын оҥорон 13 үөрэнээччи 4 секцияҕа кыттыыны ыллылар. Дьүүллүүр сүбэ быһаарытынан кыайыылаахтар дипломунан наҕараадаланнылар. Тэрээһин тэрийээччилэрэ, учууталлар инникитин да оскуола иһинэн үөрэнээччилэргэ ыытыллар НПК үгэскэ кубулуйан сылын аайы ыытылларыгар баҕа санааларын эттилэр.
