Хорсун буойун Эрхан Саввин аатынан улуустааҕы дуобат күрэҕэ буолан ааста
Олунньу 16 күнүгэр Баатаҕай нэһилиэгэр анал байыаннай дьайыы кыттыылааҕа, "Эр санаа" уордьан, “Хорсунун иһин” II ст., Жуков аатынан мэтээллэр кавалердара Эрхан Саввин сырдык кэриэһигэр аан бастакытын улуустааҕы хамаанданан уонна биирдиилээн бастыыр иһин дуобакка күрэхтэһии үрдүк таһымнаахтык буолан ааста. Бу күн Эрхан баара буоллар 24 сааһын туолуохтаах этэ...
Дуобат курдук умсугутуулаах спорт көрүҥэр Эрхан оскуола сааһыттан оонньообута, дьарыктаммыта. Оскуолаҕа, нэһилиэккэ ыытыллар күрэхтэргэ өрүү көхтөөхтүк кыттара, улахан дьонтон итэҕэһэ суох эгил-тэгил түсүһэн сөбүлээн оонньуура.
Н.Н. Тарскай аатын сүгэр спортсаала киэҥ уораҕайыгар күрэхтэһии кыттыылаахтара, нэһилиэк олохтоохторо, ыалдьыттара сарсыардаттан тоҕуоруһа муһуннулар. Эрхан Саввин олоҕун, бойобуой дьайыыга кыттыытын сырдатар быыстапка турда, киэн туттууну, сырдык аатыгар сүгүрүйүүнү үөскэттэ. Күрэххэ улуус 8 нэһилиэгиттэн 9 хамаанда, ол иһигэр 108 кыттааччы тыҥааһыннаах киирсиилэри, чаҕылхай кыайыылары көрдөрдүлэр. Оскуола кыра кылаас үөрэнээччилэриттэн саҕалаан, хамаандаҕа 12-лии киһи нэһилиэктэрин чиэһин чиэстээхтик көмүскээтилэр.
Күрэх үөрүүлээх арыллыытыгар кыттыыны ыллылар уонна эҕэрдэ тылларын анаатылар: Баатаҕай нэһилиэгин баһылыга Белолюбскай М.М., Уус Алдан улууһун спортка отделын салайааччыта Алексеев Е.П., улууска байыаннай дьайыы кыттыылаахтарын уонна кинилэр дьиэ-кэргэттэрин өйүүр отдел специалиһа Черкашин Е.Г., күрэҕи көҕүлээччи, үгүс сыллар тухары физкультура учууталынан үлэлээбит, тренердээбит Николаев Н.А., Уус Алдан улууһун дуобат федерациятын салайааччы Мигалкин А.М., күрэх кылаабынай судьуйата Захаров Е.Е. уонна төрөппүт аҕата Саввин А.Н. Күрэххэ кэлбит ыалдьыттары эҕэрдэлээн орто оскуола “Уолан” хоһоонньуттар бөлөхтөрүн уолаттара төрөөбүт дойдуларын, Баатаҕайы хоһооҥҥо тиһэн хоһуйдулар, Лөгөй лицейин үөрэнээччитэ Гриша Бурнашев ылбаҕай ырыатынан киэргэттэ.
Хамаанданан уопсай түмүккэ 3 м. – Лөгөй нэһилиэгэ, 12 тыһ. харчы Эрхан Баатаҕайдааҕы табаарыстара, бииргэ үөрэммит оҕолоро, 2 м. – Найахы нэһилиэгэ, 24 тыһ.сертификат, Саввин А.Н. бииргэ төрөөбүттэрэ, аймахтара, 1 м. – Мүрү нэһилиэгэ, 36 тыһ.харчы, Баатаҕай нэһилиэгин тэрилтэлэрэ олохтообут бириистэрин ылан кыайыы өрөгөйүн биллилэр, кинилэргэ көһөрүллэ сылдьар кубок туттарылынна. Сүрүн наҕараадалааһыны таһынан кыттааччыларга анал ааттар олохтоннулар.
Күрэхтэһии кыттыылаахтара, тэрийээччилэрэ сүргэлэрэ көтөҕүллэн, сылайбыттарын да умнан үрдүк таһымнаах күрэх ааспытын биһирээтилэр, сыл аайы кыттааччы ахсаана элбииригэр, күрэхтэһии кыаҕа кэҥииригэр баҕа санааларын эттилэр.
