Улуу Кыайыы 81 сылынан!
Аҕа дойду Улуу сэриитигэр Кыһыл аармыйа, сэбиэскэй норуот Кыайыытын 81-с сылын бэлиэтээтибит. Дойдуга барытыгар сибэтиэй күн кыайыылаахтар көлүөнэлэригэр ытыктабылбытын биллэрэн, дойду көҥүлүн уонна тутулуга суох буолуутун турууласпыт дьоммутун ахтан-санаан аастыбыт. Бу барыбыт өйдөбүнньүгэ, махталбыт уонна эппиэтинэспит – норуот хорсун быһыытын туһунан кырдьыгы харыстыыр уонна кэлэр көлүөнэҕэ тириэрдэр күммүт.
Баатаҕай нэһилиэгэр Кыайыы күнүн ыам ыйын 8 күнүттэн саҕалаатыбыт. Ол курдук, сылын аайы ыытыллар, үгэскэ кубулуйбут "Өйдөбүнньүк чүмэчи" акция тэрилиннэ. Суостаах кыргыһыыга олохторун толук уурбут буойуттары кэриэстээн, Кыайыы болуоссатыгар эдэриттэн эмэнигэр тиийэ мустаммыт бу акцияҕа кыттыстыбыт. Орто оскуола үөрэнээччилэрэ буойуттарга аналлаах монтаж аахтылар.
Ыам ыйын 9 күнэ "Өлбөт үйэлээх полк" Кыайыы парадынан саҕаланна. Парадка түөлбэлэринэн, тэрилтэлэринэн колоннаҕа арахсан сэлэлии хаамтыбыт. Улуу Кыайыыны уһансыбыт биир дойдулаахтарбытыгар сибэкки дьөрбөтө уонна өйдөбүнньүк гирлянда уурулунна. Нэһилиэк баһылыга Белолюбскай М.М. эҕэрдэ, сэрии сылын оҕото Троева В.И. кэс тыллара этилиннилэр. Нэһилиэк тэрилтэлэрэ олохтообут сэрии сылын оҕолоругар, анал байыаннай дьайыы кыттыылаахтарын дьиэ кэргэттэригэр сэмэй бэлэхтэр туттарылыннылар. Уһуйаан оҕолоруттан саҕалаан оскуола ул.кылаас оҕолоругар тиийэ эҕэрдэ хоһооннор, ырыалар этилиннилэр, ылланнылар. Буойун суруйааччы И.Артамонов "Кыайыы салюта" хоһооно күргүөмүнэн ааҕылынна. Нэһилиэк самодеятельноһын кыттыылаахтарын кэнсиэрэ турда. Нэһилиэк эдэр ийэлэрин көҕүлээһиннэринэн "Саллаат хааһыта" акция тэрилиннэ.
