Белолюбская Антонина Ивановна

Информация о материале
Опубликовано: 03.02.2022 15:09
Просмотров: 1097

1956

Мин 1956 с. бэс ыйын 25 күнүгэр Уус Алдан оройуонун Дыгдал бөһүөлэгэр төрөөбүтүм. Маҥнайгы кылааска Өспөх оскуолатыгар киирбитим. Ол кэнниттэн Майаҕас, Чараҥ оскуолаларынан үөрэммитим. Баскетболунан аан бастаан Майаҕас оскуолатыгар үөрэнэ сылдьан дьарыктаммытым. Бастакы учууталым Соловьева Матрена Егоровна этэ.

Чараҥҥа үөрэнэр сылбар ГТО диэни туттарбытым. Онно ГТО нуорматын кыһыл көмүскэ туттарбытым. 9, 10 кылаастарга Лөгөй орто оскуолатыгар үөрэммитим. Манна тенниһинэн, чэпчэки атлетикананан, баскетболунан дьарыктаммытым. 1972 с. оройуоҥҥа теннискэ 2 м., оройуон оскуолаларын икки ардыларыгар ыытыллыбыт баскетбол күрэҕэр кыргыттар 3 м. буолбуппут. Корзинаҕа элбэх мээчиги киллэрэн анал бириис ылан турардаахпын. 1973 с. үөрэнээччилэр сайыҥҥы спартакиадаларыгар үрдүгү ойууга 1 м. 20 см. ойоммун 3 м. тиксибитим.

Лөгөй оскуолатын бүтэрэн баран биир сыл колхозка, биир сыл совхозка үлэлиибин. 1976 с. ЯГУ тыа хаһаайыстыбатын факультетыгар үөрэнэ киирбитим. Бастаан утаа киирэн баран баскетболунан, онтон иккис курска волейболунан дьарыктанар этибит. Оччотооҕу студеннар өрүү площадкаҕа тахсан волейбол оонньуур этилэр. Биирдэ бииргэ үөрэнэр кыыһым, Протопопова Таня илдьэ тахсан волейболга оонньуур буолбуппут. Университет иһинэн факультеттар икки ардыларыгар волейболга күрэхтэһии бөҕө буолара. Биир оннук күрэхтэһиигэ инженерно-техническэй уонна медицинскэй факультеттар кэннилэриттэн биһиги факультет 3 м. буолан турардаахпыт. Бэһис курска преддипломнай практикабар үлэлии сылдьан “Дүпсүн” (оччолорго Өспөх отделениета Дүпсүҥҥэ киирсэр этэ) совхоз хамаандатыгар киирэн, баскетболга оонньоон оройуоҥҥа 1 м. буолбуппут. Оччолорго билигин курдук буотаҕа, күрэхтэһии буолаары гыннаҕына сбордар буолаллар этэ.

1981 с. аны “Найахы” совхоз буоллубут. Мин үөрэхпин бүтэрэн Баатаҕайга ананан кэллим. Ол күһүн оройуоннааҕы баскетбол күрэхтэһиитигэр дьахталларга 3 м., 1982 с. сайыҥҥы спартакиадаҕа волейболга 3 м. буолуталаабыппыт. Бэйэм 800 м. сүүрүүгэ 2 м. буолбутум. 1982 с. волейболга оройуон күрэхтэһиитигэр бастаабыппыт.

Кэлин             “Биэттэ” отделениета туспа совхоз буолтун кэннэ, волейболга 1992 с. иккис группаларга 2 м., 2004 с. 1 м. ылаттаабыппыт. 2001 с. гос.тэрилтэлэр профсоюзтарын икки ардыгар волейболга социальнай көмүскэл управлениетын аатыттан кыттаммыт 2 м. буолбуппут. 2011 с. Найахыга “Малая спартакиада женщин” диэн күрэххэ теннискэ 3 м., ытыыга 2 м., волейболга “Лучший игрок-ветеран” диэн анал ааты ылаттаабытым.

Спортивнай күрэхтэргэ ылбыт наҕараадаларым:

1980 с. баскетболга “Лучший защитник” с-з “Найахы”, 1982 г. “Молодой перспективный игрок” на первенстве района по волейболу, 1982-83 сс. “Найахы” совхоз волейболга “За лучшую технику”, 1996 с. СГУ уонна Биэттэ хамаандаларын табаарыстыы көрсүһүүлэригэр “Лучший разыгрывающий”, 1999 с. Николаев Н. А. кубогар волейболга “Лучший защитник”, 2000 с. “Лучший разыгрывающий” уо.д.а.

Баатаҕай нэһилиэгин ветераннара хас да сыл мэлдьи ветераннар спартакиадаларыгар үрдүк ситиһилээхтик, көрдөрүүлээхтик кыттан кэллибит. Баскетбол, волейбол курдук спорт көрүҥнэригэр хамаанда туһугар диэн туох баар күүспүн, сырабын ууран туран оонньоон кэллим. Бииргэ оонньообут кыргыттарбар, бииргэ сылдьыспыт спортсменнарбар өрүү махталлаахпын.

Спорт ветерана Белолюбская А.И.

Олунньу 1 күнэ 2022 с.