Охлопкова Мария Егоровна

Информация о материале
Опубликовано: 31.01.2022 16:41
Просмотров: 1202

1951

Мин 1951 с. кулун тутар 26 күнүгэр Уус Алдан оройуонун Түүлээх нэһилиэгэр Татьяна Ивановна, Егор Афанасьевич Неустроевтар диэн 6 оҕолоох ыалга үһүс оҕонон күн сирин көрбүтүм.

Оскуолаҕа үөрэнэр сылларбар мин ордук хайыһарынан, легкай атлетиканан дьарыктанар этим. Ол кэмҥэ Түүлээх 8 кылаастаах оскуолатыгар үөрэнэрим, ол иһин баскетбол, волейбол оонньууларын спортзал суоҕунан билбэт этим.

1968 с. Бүлүү педучилищетыгар үөрэнэ киирбитим, 1972 с. бу үөрэх кыһатын бүтэрбитим.

Манна үөрэнэрбэр баскетбол секциятыгар сборнай хамаандаҕа ылбыттара. Мин бу улахан мээчиги биирдэ да тутан көрбөтөх киһи, наһаа долгуйбутум, кыбыстыбытм даҕаны. Ол гынан, оонньуох баҕам кыайан сотору үөрэммитим. Биһиг оройуоннай, республиканскай күрэхтэргэ куруук ситиһиилээхтик кыттарбыт. Ол иһин 1970 с. Дальнай Восток зонатыгар Владивосток куоракка күрэхтэһэ барар буолбуппут. Онно тиийэн 4-с миэстэ буолан, үөрүү кынаттанан кэлбиппит.

Мин маҥнай хайыһарга сүүрэрбин биллэрбэккэ сылдьыбытым. Онтон 2-с курска үөрэнэ сырыттахпына училище үрдүнэн хайыһарга күрэх ыыттылар. Онно хамаанда састаабыгар күүстэринэн киллэрэн, бу күрэххэ кытынным уонна мин бириэмэм саамай ордуктара буолла. Мантан ыла өрүү хайыһарга күрэхтэһэр буоллум. Республикаҕа миэстэлэһэр этим, ол курдук 1971 с. 3 км. 11 мүн. 43 сөк. кэлэн 2 миэстэни, 5 км. 27 мүн. 35 сөк. кэлэн 2 мисэтэни ылбытым.

Хайыһартан сибээстээн аны легкай атлетикаҕа ылбыттара. Эмиэ республика күрэҕэр Саха АССР 50 сылыгар аналлаах кыһыҥҥы спартакиадаҕа эстафетаҕа кыттан 4*5 км. 1:50:26 кэлэн 1 миэстэни иккис группаҕа ылбытым.

1977 с. Баатаҕай орто оскуолатыгар үлэлээбитим, билигин бочуоттаах сынньалаҥҥа олоробун.

1992 с. норуот үөрэҕириитин профсоюзнай спартакиадатыгар баскетболга кыттан орто оскуолалар икки ардыларыгар 3 м. ылбыппыт, улахан ситиһиибит буолар.

Билигин сааһыран олорон санаан көрдөххө, үлэм саамай кэрэ кэмнэрэ, умнуллубат түгэннэрэ, түбүктэрэ бу оскуолабар ааспыт эбит. Олохпор сөптөөх миэстэни булан, оҕо-аймаҕы үөрэтиигэ – иитиигэ үлэлээн кэлбиппиттэн астынабын.

Саха Республикатын үөрэҕириитин туйгунабын, Саха Республикатын үөрэҕириитин бочуоттаах ветеранабын, Баатаҕай нэһилиэгин Бочуоттаах олохтооҕобун.