Республикатааҕы I лига дьахталларга волейбола
Бу дьыл кулун тутар 13-17 күннэригэр улууспут киинигэр Бороҕоҥҥо Н.Н. Тарскай төрөөбүтэ 100 сылынан кини аатынан Спорт дыбарыаһыгар республикатааҕы дьахталларга I лига волейбола ыытылла турар. Ол курдук, күн бэҕэһээ кулун тутар 13 күнүгэр улуустааҕы кииннэммит библиотека тиһигэ, Баатаҕайдааҕы олохтоох библиотека уонна Н.Н. Тарскай аатынан"Спорт Албан аата" музей фондаларыттан быыстапка турда.
Быыстапкаҕа Н.Н. Тарскай олоҕун, үлэтин уонна Саха сиригэр волейболу сайыннарыыга үгүс сыратын уурбут, бастыҥ тренер, волейболист, салайааччы Тихон Егорович Готовцев тустарынан матырыйааллар турдулар. Республика, улуус волейболга Федерацията, күрэххэ кытта кэлбит хамаандалар, тренердэр быыстапканы сэргээн көрдүлэр. Тихон Егорович волейбол тренеринэн, СГУ преподавателинэн үлэлээбитэ. Кини сырдык аатын үйэтитэн, 1995 сылтан республикаҕа ветераннар волейболларын күрэҕэ сылын аайы ыытыллар.
Саха Республикатын волейболун Федерациятын ситэриилээх директора Сивцев Яков Семенович биһиги библиотекабыт фондатыгар бэйэтэ оҥорбут "Уус Алдаҥҥа волейбол сайдыыта", "Краткая история развития волейбола в Якутии" брошюраларын уонна Саха АССР волейболга бастакы үтүөлээх тренерин, үтүөлээх учуутал Вадим Борисович Олимпиев туһунан кинигэтин бэлэх уунна. Яков Семеновичка өрүү өйүүрүн, көмөлөһөрүн иһин махталбытын биллэрэбит.
