Н.Н. Тарскай 100 сылыгар аналлаах конференция ыытылынна
Кулун тутар 5 күнүгэр 2024 с. Баатаҕай орто оскуолатыгар государственнай уонна общественнай деятель, Саха сиригэр физкультурнай хамсааһыны төрүттээбит Н.Н. Тарскай 100 сылыгар аналлаах I республиканскай, V улуснай научнай-практическай конференция ыытылынна. Конференцияҕа улуус үөрэҕин салалтата, нэһилиэк, оскуола салалтата, Н.Н. Тарскай сиэнэ Кулагина Л.А., аймаҕа Мордовская Н.И. ыҥырыылаах ыалдьыт буолан кыттыыны ыллылар.
Конференцияҕа барыта 6 секция үлэлээтэ. Ол курдук:
1 секция - Н.Н. Тарскай төрүттэрэ, олоҕун салҕааччылар;
2 секция - Н.Н. Тарскай аатын салгыы үйэтитиигэ туһуламмыт саҥа бырайыактар;
3 секция - Н.Н. Тарскай көҕүлээбит көрүҥнэрин сайдыыта;
4 секция - Байыаннай-патриотическай иитии дойдум сайдыытыгар оруола;
5 секция - Спортка анаммыт бэлиэ миэстэлэр, өйдөбүнньүктэр;
6 секция - Спорду сырдатааччылар, үйэтитээччилэр.
Бу секцияларга барытыгар улуус араас оскуолаларыттан, Бүлүү куоратыттан үөрэнээччилэр бэрт ситиһиилээхтик кытыннылар.
Биһиги библиотекабыт сэб. Пермякова А.П. уонна орто оскуола математика учууталынаан Белолюбская Н.К. 6 кылаас үөрэнээччитин Антон Татариновы 2 секцияҕа: "Н.Н. Тарскайга аналлаах "Чыпчаал" интерактивнай оонньуу" диэн чинчийэр үлэнэн кытыннардыбыт. Бу үлэ улуу киһибит олоҕун, үлэтин, кини аатын үйэтитиигэ туһуланан оҥоһулунна. Антон оҥорбут үлэтин дьүүллүүр сүбэ иннигэр көмүскээн, түмүккэ секциятыгар 1 м. ылан үөрүүтэ үгүс. Ону тэҥэ, Н.Н. Тарскай оҕолорун, сиэннэрин ааттарыттан анал бирииһинэн наҕараадаланна. Конференцияҕа кыттыбыт бары үөрэнээччилэр олус ураты, сэдэх үлэлээхтэрин биһирээтибит, инники былааннарын кэрэхсээтибит.
Күн иккис аҥарыгар кэлбит ыалдьыттар Н.Н. Тарскай аатынан "Спорт Албан аата" музейыгар экскурсия сырыттылар, сэдэх матырыйааллары көрдүлэр, иһиттилэр. Музей салайааччыта Бурнашева А.А. батыһыннара сылдьан нэһилиэк историятын, спортка ситиһиилэрин, Н.Н. Тарскай туһунан сиһилии билиһиннэрдэ. Ол кэннэ спортивнай залга тахсан, байыаннай дьыала, сэп-сэбиргэл быыстапкатын тутан-хабан кэрэхсии көрдүбүт. Оскуола үөрэнээччилэригэр ытыыга күрэх тэрилиннэ. Бу барыта Н.Н. Тарскайы кытары ситимнээх, кини аан бастаан үлэһит буоларыгар оскуолаларга байыаннай дьыала уруоктарын биэрбитэ.
Быйылгы үбүлүөйдээх сылга ыытыллыбыт конференция үрдүк таһымҥа ааста, инники соруктар, бииргэ үлэлэһиилэр былааннаннылар, кэлэр конференцияҕа республика араас улуустарын кытыннарыахха наадалааҕын бэлиэтээтилэр.
