Николай Тарскай үбүлүөйдээх күнэ сарсыардааҥҥы дьарыктартан саҕаланна!
Ыам ыйын 8 күнэ - биир дойдулаахпыт, Саха сиригэр физкультурнай-спортивнай хамсааһыны тэрийбит бастыҥ салайааччы, саха тустуутун аҕата Николай Николаевич Тарскай төрөөбүтэ 100 сылын республикабыт үрдүнэн бэрт далааһыннаахтык бэлиэтээтибит!
Бу күн Дьокуускай куорат Кыайыы болуоссатыгар, улууспут нэһилиэктэригэр уонна кииммитигэр Бороҕоҥҥо "Майаҕатта Бэрт Хара" стадиоҥҥа, нэһилиэкпитигэр Н.Н. Тарскай спортплощадкатыгар эти-хааны уһугуннарар, чэбдигирдэр дьарыктар ыытылыннылар. Дьарыктары куоракка - мэр Евгений Николаевич Григорьев, улууска - оҕо спортивнай оскуолатын тренердэрэ, нэһилиэккэ - энтузиаст, наставник Николаев Н.А., физкультура учууталлара Алексей Алексеевич Ядрихинскай, Ян Русланович Готовцев иилээн-саҕалаан тэрийдилэр. Дьон-сэргэ бу үтүө күн, сүргэлэрэ көтөҕүллэн, эттэрин-сииннэрин уһугуннаран үбүлүөйдээх күнү сэргэхтик саҕалаатылар. Бэлиэ күн улууспут нэһиилэктэрэ чэбдигирдэр дьарыктары бэйэлэрин түөлбэлэригэр ыыппыттарын үгүс киһи кэрэхсээтэ, биһирээтэ.
