Саха дьонугар ӨРӨГӨЙ күн!
Муус устар 27 күнэ - Саха Өрөспүүбүлүкэтин күнэ! Бу күн чэрчитинэн олохтоох библиотека, нэһилиэк тэрилтэлэрэ ыыппыт үлэлэрин билиһиннэриэхпит.
Муус устар 24 күнүгэр уһуйаан иитиллээччилэригэр Өрөспүүбүлүкэбит туһунан билиһиннэрэр чаас уонна бэсиэдэ ыыттыбыт. Орто уонна улахан бөлөх оҕолоро Сахабыт сирин сүрүн бэлиэлэрин, ураты дьиктилэрин, харамайдарын туһунан билсистилэр. Маны таһынан, биһиги нэһилиэк киэн туттар норуот ырыаһыта, тойуксута, артыыһа Н.Т. Алексеев 100 сылынан кини олоҕун, хаартысканан үлэтин кытары билсистилэр. Оҕолор олус сэргээтилэр, сэҥээрдилэр.
Орто оскуола 2-8 кылаас үөрэннээччилэрэ, кэтэхтэн да буоллар, сылын аайы ыытыллар "Символы Якутии. Я патриот!" өрөспүүбүлүкэтээҕи олимпиадаҕа кытыннылар. Барыта 21 оҕо кыттыыны ылла. Олимпиада 10 боппуруостаах, тест көрүҥүнэн тэрилиннэ. Кыттыбыттарга туоһу суруктар туттарыллыахтара.
Муус устар 27 күнүгэр Баатаҕайдааҕы "Түмэн" НАК тэрийиитинэн Өрөгөй күнү бүттүүн нэһилиэгинэн бэлиэтээтибит. Нэһилиэк 7 депутаттара округтарын олохтоохторун түмэн, көҕүлээн бэриллибит сорудахтарын толору арыйан күрэхтэстилэр. Араас быһыылаах иһитиннэриилэри, быыстапкалары, маастар кылаастары оҥордулар, көрдөрдүлэр. Бары сахалыы таҥнан, симэнэн бэлиэ түгэни киэргэттилэр. Маны таһынан, ураты талааннаах, дьоҕурдаах норуот маастара Людмила Ивановна Даниловна кылынан тигии үлэлэрин уонна тулалыыр эйгэни хаартыскаҕа хатыыр биир дойдулаахпыт Анастасия Васильева дьоҕус талаанын билиһиннэрдилэр. Түмэр күн кыттыылаахтара саха төрүт үҥкүүтүгэр - оһуокай тула хаамсан бу күнү түмүктээтилэр.
