Үбүлүөйдээх 100 сылынан эҕэрдэ!
Н.Н. Тарскай үбүлүөйдээх 100 сылын бэлиэтиир күҥҥэ Дьокуускай куоракка кини аатынан "Туймаада" стадион иннигэр үөрүүлээх митинг күнүс 12 ч. ыытылынна. Манна республика салалтата, спорт Министерствота, спорду сэҥээрээччилэр, төрөппүт уола Александр Николаевич дьиэ кэргэнинээн, биир дойдулаахтара Уус Алданнар уонна Баатаҕайдар тоҕуоруһа муһуннулар. Үгүс үтүө тыл этилиннэ, инники соруктар туруорулуннулар. Стадион иннигэр турар бюһугар сибэкки дьөрбөтүн уурдулар.
Күнүс 15 ч. Правительство дьиэтигэр "Республика чулуу дьоно" сериянан тахсыбыт "НИКОЛАЙ ТАРСКАЙ" кинигэтэ сүрэхтэннэ. Бу кинигэ тахсыытыгар сүҥкэн оруолу толордо, үгүс сыратын уурда аймаҕа Наталья Иннокентьевна Мордовская. Кинигэ киэҥ ис хоһоонноох, дириҥ суолталаах буолла. Урут ханна да суруллубатах, сырдатыллабатах сэдэх матырыйаалларынан байытыланна. Улуус киин библиотеката, чуолаан Мария Коммунаровна Попова үлэлэспит биобиблиографическай ыйынньыга бу кинигэҕэ киирдэ. Ааҕааччыларга олус наадалаах уонна туһалаах буолуоҕа.
Киэһээ 19 ч. Саха НКИХ "Талбан" биэриитигэр спорт ветерана, бэйэтин кэмигэр спорт председателинэн үлэлии сылдьыбыт Алексеев М.Е., спорт Министрэ Спиридонов Л.Н., нэһилиэкпит баһылыга Белолюбскай М.М., аймаҕа Мордовская Н.И. кыттыылаах ураты передачаҕа кыттыыны ыллылар. Н. Тарскай олорон ааспыт олоҕун, үлэлээбит үлэтин, үтүөтүн ахтан-санаан аастылар. Үбүлүөйдээх сылга ыытыллыбыт үлэлэр, үйэтитиигэ ыытыллыахтаах инники соруктар, былааннар тула сэһэргэстилэр.
Биир дойдулаахпыт Николай Тарскай аата үйэлэргэ ааттаныан, Саха норуота кини аатынан киэн туттуон баҕарабыт!