"Бар дьоҥҥо анаммыт олох" кылаас чааһа
Муус устар 12 күнүгэр Н.Н. Тарскай аатынан Баатаҕай орто оскуолатын 5-11 кылаас үөрэнээччилэригэр СӨ норуотун хаһаайыстыбатын үтүөлээх үлэһитэ, Уус Алдан улууһун, Баатаҕай нэһилиэгин бочуоттаах олохтооҕо Денис Алексеевич Ефимов төрөөбүтэ 90 сылыгар аналлаах "Бар дьоҥҥо анаммыт олох" диэн кылаас чааһа ыытылынна.
Кылаас чааһыгар кыттыыны ыллылар: педагогическай үлэ ветерана, "Спорт Албан аата" музей тэрийээччитэ Румянцева К.И., общественнай үлэ бастыҥа, өр сылларга "Алгыс" аҕа көлүөнэни салайбыт Бурнашева А.П., аймаҕа, ыкса ыала, сцена ветерана Сивцева Е.И., сиэнэ оскуола 10 кылааһын үөрэнээччитэ Слава Ефимов.
Денис Алексеевич олоҕун тухары төрөөбүт нэһилиэгэ, улууһа сайдарыгар үтүмэн үлэни-хамнаһы ыыппыта. Үйэтитии хайысхатыгар олохтон барыар диэри дууһатынан ыалдьара, кыһаллара. Кини үлэлээбит үлэтин туһунан ыҥырыылаах ыалдьыттар ахтыы оҥорон оҕолор интэриэстэрин тартылар. Нэһилиэк историятын, үтүөлээх дьоннорбутун, туруу үлэһиттэри сурукка тиһэн үйэтиппит кинигэлэринэн, хаартыскаларынан быыстапка турда. Ыалдьыттарга олохтоох библиотека оҥорбут сэмэй открыткатын туттарда. Ытык киһибит аата инникитин да үйэтитиллэ, сырдатылла турдун.
