Баатаҕай орто оскуолатын иһинэн 1989 с. «Кылыһах» фольклорнай куруһуок үлэлээн саҕалаабыта. Салайааччы саха тылын уонна литературатын учуутала Троева Вера Иннокентьевна.
Куруһуок икки хайысханан үлэлиирэ. Бастакытынан, оҕо талаанын норуот уус-уран айымньытыгар (сүрүннээн олоҥхоҕо) сыһыаран сайыннарыы буолар. Оҕолор тойуктуур, ыллыыр, олоҥхолуур, чабырҕахтыыр, хоһоону уус-ураннык ааҕар дьоҕуру ылаллара. Иккиһинэн, куруоһуок төрөөбүт кыраайы үөрэтэрэ. Нэһилиэк историятын чинчийии, өбүгэлэрбит үлэлэрин-хамнастарын сырдатыы, сиэри-туому үйэтитии, үгэстэри сөргүтүү киирэллэр этэ.
«Кылыһахтар» сүрүн сыалларынан-соруктарынан буолбута: оҕону дьоҕуруттан көрөн олоҥхо ис хоһоонун өйдүүргэ, сэргэҕэлээн истэргэ уонна толорорго үлэлэһии, оҕо дьоҥҥо-сэргэҕэ симиттибэккэ тахсарыгар көмөлөһүү.
Ийэ тылын кытта илдьэ сылдьар талаанын, дьоҕурун аһыллыыта уонна сайдыыта куруһуок оҕолоругар инники олохторугар күүс-көмө буолбута саарбаҕа суох. «Кылыһах» куруһуок оҕолоро 25 сыл усталаах-туоратыгар улуус, өрөспүүбүлүкэ араас таһымнаах күрэхтэригэр, тэрээһиннэригэр ситиһиилээхтик кыттыбыттара. Дьон биһирэбилин ылыахтарын ылбыттара, ыҥырыыга сылдьан ыллаабыттара, куруһуоктан фольклорнай-образцовай студияҕа тиийэ үүммүттэрэ. Ол туһунан, кинилэр үлэлэрин-хамнастарын кэпсиир выставканы сэргииргитигэр ыҥырабыт!
