1939-2011
Гаврил Еремеевич Константинов 1939 с. Уус-Алдан оройуонун Найахы нэһилиэгэр төрөөбүтэ. Арата Константинов Еремей диэн сэриигэ барбыт уонна сураҕа суох сүппүт. Ийэтэ Шелковникова Марфа Иннокентьевна Чэриктэйтэн төрүттээх. Кини 1956 с. Бурнашев Николай Алексеевичка кэргэн тахсан Баатаҕайга кэлэр. Ганя манна кэлэн үөрэнэр. Онтон Дьокуускайдааҕы педагогическай училище физкультурнай салаатын ситиһиилээхтик бүтэрэн, Чурапчы оройуонугар ананар. 1970 с. Чурапчы Чыаппаратыттан кэргэнинээн Милалыын манна көһөн кэлэллэр. 1972 сылтан 3 сыл устата физкультура учууталынан үлэлээбитэ. Салгыы кочегарынан үлэлээбитэ.
Гаврил Еремеевич биһиги нэһилиэкпит быһый атахтаахтарыттан биирдэстэрэ буолар. Кини эт-хаан өттүнэн сайдыылаах, бэйэтин кыанар тэтиэнэх киһи этэ. Өссө оскуолаҕа үөрэниэҕиттэн сүүрүүнэн дьарыктанара, хайыһардыыра. 1961 с. 30 км сүүрүүгэ III разряд нуорматын толорбута. Армияҕа сулууспалыы сылдьан хайыһарга байыаннай чаас чемпиона, 10-15 км сүүрүүгэ I м. ылан үөрүбүтэ.
Нэһилиэк, улуус, республика чиэһин чэпчэки атлетикаҕа, хайыһарга үгүстүк көмүскээбит. Хайыһарга 1 разрядтаах спортсмен. «Урожай» ДСО республикатааҕы сэбиэтин хайыһарга күрэхтэһиитин хас да төгүллээх чемпиона, призера. «Урожай» ДСО республикатааҕы сэбиэтин сүүмэрдэммит хамаандатын састаабыгар киирэн, Южно-Сахалинскай, Хабаровскай, Красноярскай, Чита куораттарга зона күрэхтэһиилэригэр республикатын чиэһин ситиһиилээхтик көмүскээбитэ. Гаврил айылҕаттан бэриллибит талааннаах сытыы, сүүрүк киһи. Дальнай Восток уонна Сибиир 10-15 км хайыһарга чемпионнаабыта. Эдэр тэтиэнэх Гаврил сылтан сыл тупсан испитэ. 1967 с. Вологда куоракка 10 км, кэлин Южнай Сахалинскайга үрдүк ситиһиилэммитэ. 1968 с. 3 км. сүүрүүгэ Дьокуускай куоракка чемпионнаабыта, аалай лентэни кэппитэ.
Гаврил Еремеевич үгүс саҥата суох бэйэтэ көрдөрөн үөрэтэр учуутал этэ. Элбэхтик сүүрдэн, хайыһардатан эрчийэрэ. Үлэтинэн-хамнаһынан кимиэхэ да сирдэрбэтэҕэ. Наһаа сэмэй, эппитин толорор, үгүһү саҥарбакка оҥорбута эрэ баар буолар этэ. Ис иһиттэн холку киэҥ көҕүстээх, дьиэҕэ-уокка бүгүрү дьоһун аҕа этэ.
Константиновтар дьиэ кэргэн 4 уоллаахтар, 1 кыыстаахтар. Уолаттара төрдүөн аҕаларын удьуордаан кытыгырастар, күүстэрин холонон көрөллөр. Маныаха аҕаларын уһуйуута, такайыыта улахан суолталаах.
БИБЛИОГРАФИЯ
Кинигэлэргэ
- Бурнашев Н.Н. Өбүгэ быстыбат ситимэ: [Николай Алексеевич Бурнашев дневнигэ] / Бурнашев Н.Н., Лепчикова С.Н. – Бороҕон: Мүрү саһарҕата, 2019. – 41-42 с.
- Ефимов Д.А. Төрөөбүт түөлбэбит Баатаҕай / Д. А. Ефимов. – Дьокуускай: Көмүөл, 2007 – 79 с.
- Румянцева К. И. Ахтар-саныыр үөрэҕим кыһата: [Н. Н. Тарскай аатынан Баатаҕай орто оскуолата] / К. И. Румянцева. – Дьокуускай: Издатель Э.Т. Пономарев, 2020. – 237-238 с.
- Жирков И.М. 20-с үйэҕэ Уус Алдан чулуу спортсменнара / И. М. Жирков, И. И. Захаров. – Дьокуускай: Сахаполиграфиздат, 2004. – 90 с.
