1952
Мин 1952 сыллаахха сэтинньи 3 күнүгэр Баатаҕай нэһилиэгэр холкуостаах дьиэ-кэргэҥҥэ төрөөбүтүм. Бииргэ төрөөбүт төрдүөбүт. Аҕам Готовцев Алексей Николаевич колхозка, совхозка хонуу биригэдьииринэн, завхоһунан, кассирынан үлэлээбитэ. Ийэм Ядрихинская Матрена Степановна колхозка, совхозка дояркалаан пенсияҕа тахсыбыта.
Оскуолаҕа үөрэнэ киирэн баран улахан оҕолор Сивцев Сеня, Румянцев Толя, Готовцев Петя остуол тенниһинэн оонньуулларын көрөн сөбүлээн оонньуу үөрэммитим. Аан бастаан 1966 с. оҕолорго оройуоннай күрэхтэһиигэ киирэн кыттан I миэстэҕэ тиксибитим. Ол кэмнэргэ Баатаҕай оскуолатын хамаандата остуол тенниһин күрэхтэһиитигэр куруутун инники сылдьара бастыыра.
1967 с. республикаҕа ыытыллыбыт оскуола оҕолорун күрэхтэһиитигэр Сеня Сивцев, Валя Сивцева уонна мин хамаанданан I миэстэ буолбуппут.
Абсолютнайга мин I миэстэҕэ тиксибитим. 1968 с. оройуоҥҥа улахан дьоҥҥо оонньоон бастаабытым. Онтон ыла оройуоҥҥа улууска элбэхтик бастаабытым, II-III миэстэлээх призер буолуталаабытым.
1974 с. Бүлүүгэ ДСО “Урожай” күрэхтэһиитигэр 1 миэстэҕэ тиксибитим. Үгүстүк II-III миэстэлээх призер буолуталаабытым.
2012 с. Дальнай Восток федеральнай уокурук чемионатыгар кыттан ветераннарга II — с буолбутум.
Заречье уонна элбэх республиканскаq күрэхтэргэ I-II-III миэстэлээх призер буолуталаабытым. Тыа сирин оонньууларын курэхтэһиилэригэр хамаандаҕа киирэн хамаанданан II-III миэстэҕэ тиксибитим.
Кэлин сылларга ветераннарга күрэхтэһии баар буолан республикаҕа бириистээх миэстэҕэ тиксэбин.
Остуол тенниһигэр, национальнай атах оонньуутугар I разрядтаахпын.
Оройуоҥҥа национальнай ыстаныыларга II-III миэстэҕэ тиксибитим. Улуус хамаандатыгар киирэн II төгүл Манчаары күрэҕэр спартакиадаҕа оройуон чиэһин көмүскээбитим.
1976 сыллаахха кэргэннэммитим. Кэргэним Антонина Афанасьевна учуутал идэлээх. 18 сыл оҕо иитиитигэр, 24 сылтан тахса социальнай үлэһитинэн үлэлээн пенсияҕа олорор, «Социальнай сулууспа туйгуна». Баатаҕай нэһилиэгин Бочуоттаах олохтооҕо. Түөрт оҕолоохпут.
Улахан уол Степан үрдүк үөрэхтээх, учуутал идэлээх. Дьокуускай куорат 7-с нүөмэрдээх оскуолатыгар технология учуутала. Кэргэннээх, икки кыыс оҕолоох. Кэргэнэ Мария Борисовна үрдүк үөрэхтээх, куорат 17-с нүөмэрдээх оскуолатыгар алын сүһүөх оҕолоругар учуутал, «Саха Ресиубликатын үөрэҕириитин туйгуна». Улахан сиэним Настя сбербаҥҥа атыы-эргиэн менеджера. ЯФ СибУПК экономист идэтигэр кэтэхтэн үөрэнэр. Кыра кыыс Матрена 17-с нүөмэрдээх оскуола 8 физмат кылааһыгар үөрэнэр.
Улахан кыыс София үрдүк үөрэхтээх, кэргэннээх, икки оҕолоох. ПАО Сбербанк ипотечнай кредитование менеджера. Кэргэнэ Сергей Васильевич — предприниматель. Улахан уол Никита Дьокуускай куорат 7-с нүөмэрдээх оскуолатын 9 кылаас үөрэнээччитэ. Кыра уол Артем 7-с оскуола 5-с кылааһын үөрэнээччитэ.
Кыра кыыс Татьяна ЯГУ-ну, БГ’УЭП юриспуденциятын бүтэрбитэ. Билигин Нерюнгри куоракка “Золотая Якутия” ювелирнай маҕаһыыҥҥа продавец-кассир, кэргэннээх, кыыс оҕолоох. Кэргэнэ Дмитрий Кимович Нерюнгри оройуонун налоговай сулууспатыгар отдел начальнигынан үлэлиир. Оҕолоро Нелли «Полянка» детсад иитиллээчитэ.
Кыра уол Алексей үрдүк үөрэхтээх, учуутал идэлээх, кэргэннээх, түөрт оҕолоохтор. Баатаҕай орто оскуолатын физкультураҕа учуутала. Кэргэнэ Сардана Ивановна үрдүк үөрэхтээх, учуутал идэлээх. Баатаҕайдааҕы оҕо саадыгар методист иитээччинэн үлэлиир. Улахан кыыс Алиса Баатаҕай орто оскуолатын 5-с кылааһыгар, кыра кыыс Ксюша 4- кылааһыгар үөрэнэллэр. Уоллара Арчылаан оҕо саадын иитиллээччитэ.
СР физическай культуратын уонна спордун сайыннарыыга үтүөлэрим иһин, СР физическай культура уонна спорт сайдыытын 90 сылыгар бэлиэлэрдээхпин, СР физическай культураҕа уонна спортка, “Урожай” ДСО бочуоттаах ветеранабын, Баатаҕай нэһилиэгин Бочуоттаах олохтооҕобун.
