Бу дьыл балаҕан ыйын 20 күнүгэр дойдубут киинигэр Москваҕа киэн туттар биир дойдулаахпыт, государственнай уонна общественнай деятель, Саха сиригэр маассабай спорду, олимпийскай уонна национальнай спорт көрүҥнэрин түстээччи Николай Николаевич Тарскай төрөөбүтэ 100 сыллаах үбүлүөйүнэн, дойдутун дьоно уонна төрөппүт уола Александр Николаевич Тарскай, Николай Николаевич үөрэммит үөрэҕин кыһатын «ГЦОЛИФК» сылдьан, үөрэх тэрилтэтин кытта көрсөн, кэпсэтэн, үбүлүөйдээх сылынан дойдутуттан эҕэрдэ, махтал тыллардаах суруктары, өйдөбүнньүк бэлэхтэри, кинигэлэри туттардыбыт.
РУС «ГЦОЛИФК» дойду биир улахан, киэҥ историялаах, дириҥ үгэстэрдээх элбэх талааннаах салайааччылар, олимпиецтар, чемпионнар, спортсменнар иитиллэн тахсыбыт кырдьаҕас үөрэҕин тэрилтэтэ.
Университет спортивнай музейа аан дойдуга биир баай историялаах, үгүс элбэх, сэдэх экспонаттаах спорт эйгэтигэр баар музейынан биллэр.
Ыраахтан тиийбит дьон сиэринэн, илии тутуурдаах, бэлэх кэһиилээх ыалдьыттаатыбыт.
Дойдутун дьоно, Баатаҕайдар ааттарыттан, эҕэрдэ сурук, Н.Н.Тарскай туһунан «Выдающиеся люди республики» сериянан тахсыбыт саҥа кинигэни, үбүлүөйдээх статуэтканы, мамонт муоһуттан сувениры бэлэх ууннубут.
Саха Өрөспүүбүлүкэтин физическай култуураҕа уонна спортка министиэристибэтин аатыттан махтал сурук уонна Саха сирин спордун историятын туһунан саҥа тахсыбыт кинигэтин туттардыбыт.
Тустуук спортсменнар ааттарыттан Н.Н.Тарскай 100 сылынан анаан үбүлүөйдээх чороонун өрө ууннубут, эҕэрдэ эттибит.
Н.Н.Тарскай уола Александр Николаевич Университет спортивнай музейыгар 50-с сыллардааҕы аҕата үөрэммит кэмин кэрэһэлиир хаартыскалары, 1954 сыллаах выпуск түсүт уопсай хаартыскатын, Н.Н.Тарскай тус докумуоннарын бэлэхтээн, музей директора Елена Ивановна Сидорова үөрүүтэ баһаам. Музейга ити сыллааҕы выпуск хаартыската суоҕун эттэ, оригинал, кэннигэр суруктаах, илии баттааһыннаах историческай хаартысканы тутан, үйэлээҕи сыаналыыр идэлээх үлэһит махтала муҥура суох буолла.
Инникитин да, дойду биир сүдү үөрэҕин кыһатын РУС «ГЦОЛИФК» кытта сибээһи быспакка билсэ, икки өттүттэн үлэлэһэ олоруох буолан биир сүбэҕэ кэллибит.
Иһитиннэриини оҥордо биир дойдулаахпыт Туяра Готовцева.
