Тихон Готовцев XXX турнира
Муус устар 13 күнүгэр Мындааба бөһүөлэгэр спортивнай оскуола спортсаалатыгар биир дойдулаахпыт, бастыҥ тренер Тихон Егорович Готовцев сырдык аатыгар ыытыллар ветераннарга волейбол күрэҕэ XXX төгүлүн бэрт тыҥааһыннаахтык, сэргэхтик буолан ааста. Турнирга барыта 5 хамаанда кыттыыны ылла, ол курдук улууспутуттан "Тойон Мүрү", "Дүпсүн", Мэҥэ-Хаҥаластан "Манчаары", Дьокуускай куораттан "Сахапечать", "Аргыс" волейбол хамаандалара күөн көрүстүлэр.
Баатаҕай нэһилиэгэ бу күрэххэ Т. Е. Готовцев олоҕун, үлэтин билиһиннэрэр быыстапка туруорда, күрэх аһыллыытыгар кыттааччыларга Н.Н. Тарскай быйылгы 100 сыллаах үбүлүөйүнэн өйдөбүнньүк бэлэхтэри туттартаата, сытыы киирсиилэри баҕарда. Спортивнай оскуола үөрэнээччилэрэ, күрэхтэһэ кэлбит ыалдьыттар, волейболу таптааччылар быыстапканы сэргии көрдүлэр, иһиттилэр.
Күрэх түмүгүнэн, 1 м. - Дьокуускайтан "Аргыс" ВК, 2 м. - Уус Алдантан "Тойон Мүрү" ВК, 3 м. Мэҥэ-Хаҥаластан "Манчаары" ВК кыайыы өрөгөйүн биллилэр. Сахаваболу сэргиир ветеран спортсменнарга доруобуйаны, инникитин өссө элбэх ситиһиини баҕара хаалабыт.
