"Уруйдуубут Улуу Кыайыыны!" улуустааҕы көрүү-фестиваль Баатаҕайга
Сылын аайы үгэскэ кубулуйбут улуус нэһилиэктэрин икки ардыларыгар ыытыллар көрүү-фестиваль быйыл Улуу Кыайыы 80, Россияҕа Аҕа дойдуну көмүскээччи, Саха Республикатыгар Ийэ дойдуну көмүскээччи сылларыгар туһуланан тэрилиннэ. Фестиваль икки бөлөҕүнэн ыытылынна. Кыра нэһилиэктэргэ барыта 9 нэһилиэк кыттыыны ылла.
Ол курдук, олунньу 27 күнүгэр фестиваль Баатаҕай нэһилиэгэр буолан ааста. Бастакы түһүмэххэ нэһилиэк Аҕа дойду сэриитин историятыгар, буойуттарыгар, кинилэр ийэлэригэр уонна сэдэх экспонаттарыгар аналлаах быыстапка турда. Фестиваль балаһыанньатынан сэрии кыттыылаахтарыгар "Өлбөт үйэлээх полк", кинилэр хорсун ийэлэрин туһунан улуус кииннэммит библиотекатын сайтыгар тиһиллибит анал сайттарынан виртуальнай быыстапкалар сырдатыллыахтаахтар. Бу икки хайысханы Н.Н. Тарскай аатынан Баатаҕай орто оскуолатын 7 кылааһын үөрэнээччитэ Новгородов Ян уонна 8 кылаас үөрэнээччитэ Иванова Айынара көмүскээтилэр. Сэдэх экспонатка саллааттар суруктарын, сэрии ветераннара сэрииттэн илдьэ кэлбит малларын сырдаттыбыт. Готовцев Петр Игнатьевич Илиҥҥи фронтан илдьэ кэлбит саабылатын сороҕо үгүс дьон интэриэһин тарта. "Кылыһах" куруһуок үлэлээбит кэмнэригэр үөрэтиллибит Булуҥҥа балык булда, Ааллаах Үүн айанньыттара, Кыайыы ыһыаҕа, саллааттар суруктара сэдэх матырыйааллара быыстапканы киэргэттилэр.
Быыстапкаҕа фотозона оҥоһуллан турда. Манна Сталин мэтириэтиттэн саҕалаан, бэйэ оҥоруу пулеметугар тиийэ киэргэтиллэн дьон биһирэбилин, кэрэхсэбилин ылла. Олохтоох библиотека аатыттан быыстапка туруутугар көмөлөспүт аҕам саастаах ытык дьоммутугар, биирдиилээн мал уларсыбыт, кэлэн көмөлөспүт кыргыттарга махтал бастыҥын аныыбыт.