Култуура отдела тэриллибитэ 80 сылыгар
Кулун тутар 18-28 күннэригэр Уус Алдан улууһугар култуура отдела тэриллибитэ 80 сылыгар аналлаах декада ыытылла турар. Бу бэлиэ кэрчиккэ аналлаах "Улуус култууратын историята уонна билиҥҥитэ" диэн библиотечнай урок орто оскуола 5,6,8,9,10 кылаас үөрэнээччилэригэр ыытылынна.
1945 с. ыам ыйын 25 күнүгэр тэриллибит политпросвет отделыттан саҕалаан, күн бүгүҥҥэ диэри үлэлии-хамсыы, айа-тута сылдьар култуура салаатын историятын оҕолор бэрт интэриэстээхтик иһиттилэр. Сүрүннээн билистилэр - бастакы кинотеатр, нарын ырыалаах Найахы хорун, кэрэҕэ кынаттыыр "Кэнчээри" ансамбль, улуус музейын, киин библиотечнай тиһик тустарынан. Инники ааттаммыттарга анал кинигэлэрин сэргээтилэр.
Маны сэргэ, тыл культуратын туһунан туспа бэсиэдэ оҥоһулунна. Общественнай миэстэлэргэ, аҕа саастаах дьоҥҥо, эт саастыылаахтарга убаастабылы, ытыктабылы биллэрэн тыл култууратын тутуһарга иһитиннэрии оҥоһулунна. Үөрэнээччилэр куһаҕан тылынан кэпсэтии, саҥарсыы туохха тириэрдэрин бэрткэ диэн билэллэрин биһирээтим. Уруок устата бар көхтөөх кыттыыны ылбыттарыттан астынным.
