1946
Иннокентий Гаврильевич 1946 с. Уус-Алдан оройуонун Баатаҕай нэһилиэгэр колхозтаах дьиэ-кэргэнигэр төрөөбүтэ. Аҕата Сивцев Гаврил Васильевич үлэ фронуттан төннөн кэлэн баран 1947 с. ыалдьан өлбүтэ. Ийэтэ Сивцева-Готовцева Мария Николаевна колхозка өр кэмҥэ доярканан үлэлээн 1964 с. 52 сааһыгар күн сириттэн күрэммитэ.
1953 с. Чараҥай сэттэ кылаастаах оскуолатыгар үөрэнэ киирбитэ. 1957 с. оскуола Баатаҕайга саҥа тутуллан үлэтин саҕалаабыта. 1962 с. аҕыс кылааһы онно бүтэрбитэ. Онтон 9-с кылаастан Дүпсүн орто оскуолатыгар 11 кылааһы бүтэриэр диэри үөрэммитэ.
1965 с. орто оскуоланы бүэрэн баран СГУ физико-математическай факультетыгар үөрэнэ киирбитэ. Ити сайын «Урожай» спортивнай общество күрэхтэһиитигэр атах оонньуутугар Саха АССР спордун маастарын нуорматын толорбута. Оччолорго oҕo барыта кэриэтэ спордунан дьарыктанар этэ.
Баатаҕайга үөрэнэр кэмнэригэр физругунан республика рекордсменнарын элбэх төгүллээх чемпиона Румянцев Иван Семенович элбэххэ үөрэппитэ. Онтон Дүпсүн орто оскуолатыгар физругунан саҥа үрдүк үөрэҕи бүтэрэн кэлбит, хайыһарга республика күүстээх спортсмена Жирков Иван Михайлович оҕолор эт-хаан өттүнэн сайдалларыгар утумнаахтык үлэлэһэр этэ. Чэпчэки атлетикаҕа, хайыһарга оҕолор pecпубликанскай күрэхтэһиилэргэ ситиһиилээхтик кыттар этилэр.
Университекка үөрэнэр кэмнэригэр спортка Кочнев Валерий Пантелеймонович дьарыктаабыта. Бу кэмҥэ атах оонньуутун чулуулара Николай Санников, Иван Горохов, Максим Куприянов, Иван Андреев, Михаил Габышев бастыҥнар кэккэлэригэр сылдьаллара. 1967 с. Нальчик куоракка ыытыллыбыт универсиадаҕа күрэхтэһэн кэлбиттэрэ. 1969 с. Дальнай Восток уонна Сибиир спартакиадатыгар атах оонньуутугар Кызыл (Тува) куоракка баран күрэхтэһэн 3-с буолбута. Республика күрэхтэһиилэригэр чэпчэки атлетикаҕа уонна атах оонньуутугар ситиһиилээхтик кыттара. Илларион Владимиров, Евгений Прима, Николай Неворотов буолан 4*100 м. эстафетаҕа рекорд оҥоро сылдьыбыттара.
1969 с. “Хатырык” совхозка спортинструкторынан үлэлээбитэ. Онтон 1970 с. Баатаҕай оскуолатыгар учууталынан үлэлии кэлбитэ. 1977 с. Баатаҕай сельсоветын секретарынан үлэлии киирбитэ. Бу кэмҥэ сельсоветтар икки ардыларыгар куоталаһыыга бастаан «Москвич», «Запорожец» массыына фондаларынан наҕараадаламмыттара. 1982 с. сельсовекка главнай бухгалтерынан 1994 с. диэри үлэлээбитэ. Онтон спортинструкторынан үлэлээн 2001 с. пенсияҕа тахсан уурайбыта.
Иннокентий Гаврильевич үлэ, спорт ветерана, спортка кылаатын иһин “Урожай” общество 50 сылынан бэлиэлээх, нэһилиэк Бочуоттаах олохтооҕо, “Баатаҕай нэһилиэгэр спорт сайдыытыгар кылаатын иһин” бэлиэ хаһаайына, улахан дьиэ-кэргэн аҕа баһылыга, элбэх сиэн, хос сиэн эһээтэ.
БИБЛИОГРАФИЯ
Кинигэлэргэ
- Ефимов Д.А. Төрөөбүт түөлбэбит Баатаҕай / Д. А. Ефимов. – Якутск: Көмүөл, 2007 – 77 с.
- Ефимов Д. А., Румянцева К. И., Бурцева Р.И. Улахан олох аргыстара / Д.А. Ефимов, К. И. Румянцева, Р. И. Бурцева. – Дьокуускай: РПК “Оригами”, 2010. – 43-44 с.
- Жирков И.М. 20-с үйэҕэ Уус Алдан чулуу спортсменнара / И. М. Жирков, И. И. Захаров. – Дьокуускай: Сахаполиграфиздат, 2004. – 122 с.
- Посельский В. Летающие прыгуни земли Олонхо: прыгун И. Сивцев / В. Посельский. – Якутск: Сахаполиграфиздат, 2001 . – 48 с.
- Румянцева К. И. Ахтар-саныыр үөрэҕим кыһата: [Н. Н. Тарскай аатынан Баатаҕай орто оскуолата] / К. И. Румянцева. – Дьокуускай: Издатель Э.Т. Пономарев, 2020. – 139-140 с.
Периодическай бэчээккэ
- Кондратьев И. Х. Эдэр саастарын эргитэн: [Сивцев И. Г. туһунан] / И. Х. Кондратьев // Ленинскэй тэрийээччи. – 1990. – Муус устар 3 к.
- Посельский В. Тарскай музейыгар Олимпийскай факел / В. Посельский // Спорт Якутии. – 2014. – Тохсунньу 23 к.
- Посельский В. Төрүт удьуордары утумнаан / В. Посельский // Спорт Якутии. – 2014. – 25 декабря.
- Румянцева К. И. Баатаҕайтан бастакы спорт маастара / К. И. Румянцева // Мүрү саһарҕата. – 2010.
- Федорова В. Кылыыһыт Киэсэ: [Сивцев И. Г. Саха АССР спордун маастарын нуорматын толордо] / В. Федорова // Мүрү саһарҕата. – 2001. – Олунньу 24 к. – 6 с.
