1952
Роман Прокопьевич 1952 с. олунньу 4 күнүгэр Биэттэ эбэ Халдьаайытыгар 5 оҕолоох Петрова Мария Михайловна уонна Петров Прокопий Андреевич диэн ыалга төрдүс оҕонон төрөөбүтэ.
Эдьиийэ Маайыс 5 оҕолоох, убайдара Владимир, Василий иккилии оҕолоох этилэр. Быраата Дмитрий уонна кини биирдии оҕолоохтор. Сиэннэр, хос сиэн даҕаны баар буоллулар.
Аҕатын эһэтэ Петров Василий (Тииҥ Баһылай) диэн 1 уоллаах, 7 кыыстаах киһи Соһолоох диэн алааска төрөөн — үөскээн ааспыт, XIX үйэ саҥата, ортото быһыылаах.
Ийэтин эһэтэ Аманатов Пркопий Михайлович диэн Чараҥайга, Улахан Сыһыы эргин олохтоох эбит. Ийэтин бииргэ төрөөбүттэрэ Уччаһын Дьөгүөр, Намҥа олохсуйбут эмиэ Дьөгүөр, Даайа (Кэптэни), Байыыра ийэтэ, Буурҕалаах ийэлэрэ.
Оскуолаҕа 1958 сыллаахха киирбитэ. Олохтоох оскуоланы 1967 сыл бүтэрбитэ, ол кэнниттэн 9-10 кылаастарга Найахы орто оскуолатыгар үөрэммитэ. Кэнэҕэс физика учуутала буолар акылаатын, манна физикаҕа үөрэппит Роза Сидоровна Васильева уурбута. Оскуола кэнниттэн колхозка үлэлээбитэ, армияҕа сылдьыбыта. Колхозка ордук тапсан үөлээннээҕэ Белолюбскай Петр Петровиһы (Бүөтээһи) кытта үлэлээбитэ.
1972 сыллаахха СГУ физико-математическай факультетыгар физика отделениетыгap туттарсан киирбитэ уонна 1978 сыллаахха бүтэрбитэ. Үөрэнэр кэмнэригэр убайа Дмитрий Дмитриевич Петров элбэхтэ материальнай, моральнай көмө оҥороро.
Үөрэнэр сылларыгар тустуунан дьарыктанан иһэн тохтообута. Эрчиллиигэ улахан маастардары кытта бииргэ сылдьара. Холобур: Союз икки төгүллээх чемпиона Гаврил Дмитриев, Саха АССР 3 төгүллээх чемпиона буолбут Афанасий Монастырев уо.д.а.
Дипломнай үлэтин 3 сыл устата Космофизика институтугар «Yөһээҥҥи салгын араҥатыгар барар» процесстары чинчийэн үөрэтиигэ суруйан “туйгун” сыанаҕа көмүскээбитэ. Ол гынан баран, дьонноро кыаллыбаккалар, дойдутун оскуолатыгар физика, математика предметын учууталын быһыытынан үлэтин саҕалаабыта.
1982 сылтан 1989 сылга диэри оскуолатыгар директордаабыта. 1989 сыллаахха «РСФСР норуотун үөрэҕириитин туйгуна» буолбута. 1989-1992 сс. нэһилиэк сельсоветын исполкомун бэрэссэдээтэлинэн үлэлээбитэ. Бу сылларга спортзал тутуута ситэриллэн бүппүтэ, ФАП участковай балыыһа буолбута, совхоз күүһүнэн саҥа почта дьиэтэ үлэҕэ киирбитэ, олохтоох телевидениеҕа аппаратура ылыллыбыта, оскуола орто оскуола буолбута уонна Н.Н.Тарскай аата иҥэриллибитэ, оскуола иһинэн музей тэрээһинэ быһаарыллыбыта. «Үрдүк үүнүү» звенотугар былыргы быраҕыллыбыт улахан суоруна таастары саҥалыы ирдэбилгэ сөп түбэһэр гына миэлиҥсэ оҥорон Ушницкай Н.Н. (Муокас), Ушницкай В.Н., Лугинов A.П. бастакы президент М.Н. Николаев сэҥээриитин ылбыттара. Бөһүөлэк иһинээҕи электролиния саҥаттан тардыллыбыта. Нэһилиэк кыраныыссата чуолкайдаммыта. Олох тутула уларыйар буолан үлэлииргэ кэккэ ыарахаттар бааллара.
1992-1994 сс. орто оскуолаҕа директордаабыта. Оскуола материальнай базата балай эмэ бөҕөргөөбүтэ. Ол курдук, оскуола балансатыгар икки МТЗ-82, биир Т-16 трактордар, охсор косилка, трактор боковой мунньара, ГАЗ-53 массыына бу сылларга булуллубуттара. Оскуола иһинэн ТОО «Кэскил» диэн тэриллибитэ. Үөрэтии-иитии өттүгэр эмиэ саҥа сүүрээннэр киирбиттэрэ.
1994-97 сс. улуус киинигэр саҥа тэриллэн аһыллар Мүрүтээҕи уолаттар гимназияларыгар физика учууталынан үлэлээбитэ. Бу сылларга саҥа үөрэх тэрилтэтин коллектива оннун буларыгар директор Филиппов Валентин Иванович (уруккута Чараҥай (Баатаҕай) оскуолатын үөрэнээччитэ) элбэхтик сүүрбүтэ-көппүтэ. Онно профсоюзнай тэрилтэ сөптөөх көмөнү-өйөбүлү оҥоро сатаабыта.
Саахымакка бэлэмнээбит оҕолоро 1997 сыл республикаҕа «Үрүҥ ладья» бирииһигэр II миэстэҕэ тахсаннар республика тренердэрин улаханнык соһутан турардаахтар.
1997-2002 сс. улууска иккис улахан оскуолаҕа Мүрү 2 №-дээх оскуолатыгар директордаабыта. Оскуолаҕа капитальнай ремонт ыытыллыбыта, гараж тутуллубута, үлэлээбэккэ турбут балаҕан-дьиэ музей буолбута. Оҕолору итии аһылыгынан хааччыйыы оннун булбута, остолобуой үлэлээбитэ. Оҕолор научнай үлэлэрэ республикаҕа, Россияҕа тиийэ тахсыбыттара. «Прикладной экология», «Физкультура институтун», Биолого-географическай факультеты кытта бииргэ үлэлээһин договордара түһэрсиллибиттэрэ. Сайыҥҥы лааҕырдар: научнай үлэҕэ, кыаммат араҥа оҕолоругар, спортивнай хайысхалаах аһыллыбыттара.
Саахымакка, дуобакка оҕолор улууска инники күөҥҥэ сылдьыбыттара. Саахымакка эрчийбит үөрэнээччитэ Румянцев Сеня республика сборнай командатыгар киирэн 2000 с. II «Азия оҕолоро» международнай оонньууга кыттыыны ылбыта.
2002 с. сэтинньититтэн улуустааҕы оҕо техническай айымньытын киинин директорынан үлэлиир. Бу сылларга техническэй спорт көрүҥнэригэр улуус оҕолоро мэлдьитин республикаҕа миэстэҕэ киирэллэр (ракетомоделирование, авиамоделизм, кордовай массыыналарга).
2007 с. биир үөрэнээччитэ (Белолюбскай Ариан) Казахстан Байконур куоратыгар тиийэн 1-кы Азия чемпионатыгар ракетомоделированиеҕа кыттыыны ылбыта.
2008 с. республикаҕа үөрэнээччилэр «Инникигэ хардыы» диэн научнай- практическай конференцияларыгар «Техническай наукалар» диэн разделга улуустан барбыт 4 оҕоттон 1 лауреат, 3 дипломант буолан кэлбиттэрэ.
2008 с. оҕолор Республиканскай Техническай быыстапкаларыгар 10 разделтан иккитигэр бастакы, биир иккис, биир үһүс миэстэлэри, 5 oҕo үлэтэ хайҕанан сөптөөх үчүгэй түмүгү көрдөрбүттэрэ.
Общественнай үлэ быһыытынан үөрэх үлэһиттэрин улуустааҕы профсоюзнай комитетын президиумун чилиэнэ. Саахымат Федерациятын толорооччу директорынан сылдьыбыта, кэнники республиканскай спортивнай оонньууларга саахымакка улуус хамаандата 3-с миэстэни ылбыта. Бу улуус хаһан да ылбатах кирбиитэ этэ.
2007 с. «Улууска үөрэх сайдыытыгар киллэрбит кылаатын иһин», «Баатаҕай нэһилиэгин Бочуоттаах гражданина», «Саха Республикатын үөрэҕириитин туйгуна» знактарынан бэлиэтэммитэ.
