1959-1980
Баатаҕай нэһилиэгин илин өттүгэр “Хомустаах” эбэ кытыытыгар саҥа дьиэ-уот туттан олорор 6 оҕолоох Сивцевтэр дьиэ кэргэттэригэр 1959 с. кулун тутар 27 күнүгэр иккис уол оҕонон төрөөбүтэ. Ваня кыра эрдэөиттэн сүөһү көрүүтүгэр, дьиэ ис-тас үлэтигэр олус көмөлөөх, дьаһаллаах, толоругас, кыайыгас этэ диэн ахталлар.
1966 с. Баатаҕай аҕыс кылаастаах оскуолатыгар үөрэнэ киирбитэ. Маҥнайгы учуутала Заровняева Евдокия Саввична диэн. Ваня кыра уҥуохтаах, маадьаҕардыҥы атахтаах, сахалыы быһыылаах-таһаалаах, хара баттахтаах, дьээбэлээх бэтиэхэлээх, сытыы-хотуу, спортсмен, түмэр-көҕүлүүр талааннаах, үөрэҕэр үчүгэй этэ диэн табаарыстара ахталлар. Ону таһынан, кинини олус үчүгэйдик уруһуйдуурун, ону-маны мунньар дьарыктааҕын: открытка арааһын, значоктары, тустуу туһунан комплект-открыткалары, маркалары мунньарын сөбүлүүрэ.
Ваня кыра кылааска үөрэнэр эрдэҕиттэн тустууга, хапсаҕайга, ыстаныыга, сүүрүүгэ, дуобакка, саахымакка, ытыыга дьоҕурдааҕын бэлиэтии көрбүттэр. Ол саҕана кинилэри физкультура учууталлара дьарыктыыллара эбитэ үһү. Физруктарынан хайыһардьыт Константинов Гаврил Еремеевич, Николаев Николай Адамович үлэлииллэрэ. Баатаҕай аҕыс кылаастаах оскуолатын 1974 с. үөрэнэн бүтэрэр. Көҥүл тустууга талаанын, үгүс ситиһиитин таба көрөн, тренер Наум Егорович Ермолаев Ваня төрөппүттэриттэн кэлэн сөбүлэҥнэрин ылан, кинини тустууга эрчийээри оҕо спортивнай интернат-оскуолатын Курбуһахтааҕы филиалыгар үөрэттэрэ илдьэ барар. Онно тиийэн үөрэнэ сырыттаҕына тренерэ Наум Егорович соһуччу олохтон туораан, салгыы Николай Николаевич Рожиҥҥа дьарыктаммыт. Бу үөрэнэр сылларыгар оскуолатын, оройуонун, республикатын чиэһин элбэх күрэхтэргэ көмүскээбитэ, чемпион, призер буолуталаабыта, тустууга спорт маастарыгар кандидатка тиийэ үүммүтэ. Ону туоһулуур элбэх наҕараадалара билигин бииргэ төрөөбүттэригэр баар.
Оскуола кэннэ эһэтин уһуйуутунан сорсуннаах булчут буолбута. Хомойуох иһин, баара-суоҕа 21 эрэ сааһыгар күн сириттэн күрэммитэ.
БИБЛИОГРАФИЯ
Кинигэлэргэ
- Ефимов Д.А. Төрөөбүт түөлбэбит Баатаҕай / Д. А. Ефимов. – Дьокуускай: Көмүөл, 2007 – 78 с.
Периодическай бэчээккэ
- Сивцев Н. Тустуунан үлүһүйэн дьарыктаммыта / Н. Сивцев // Мүрү саһарҕата. – 2014. – Ыам ыйын 14 к.
Дакылаат
- Сивцев Н. Спорт – олоҕун аргыһа: дакылаат // Баатаҕай — 2014.
