1955
Мин, Белолюбскай Михаил Петрович, 1955 с. балаҕан ыйын 15 күнүгэр Баатаҕай нэһилиэгэр төрөөбүтүм. 1971 с. Баатаҕай 8 кылаастаах оскуолатын бүтэрэн Лөгөй орто оскуолатыгар үөрэнэ барбытым. Аан бастаан онно тустуунан дьарыктаммытым. 1973 с. Лөгөй орто оскуолатын бүтэрэн баран Советскай Армияҕа сулууспалаабытым.
1975-77 сс. П-Заболоцкай совхозка рабочайдыы сылдьан кыратык тустар, уһун дистанцияҕа 5000 м. сүүрэр этим. 1977 с. Дьокуускайдааҕы 1 нүөмэрдээх педучилищеҕа физкультурнай отделениеҕа үөрэнэ киирбитим. Онно киирэн баран бастаан гимнастиканан дьарыктаммытым, хайыһардыыр этим. Онтон тустуу тренерэ таба көрөн тустууга киир диэн көҥүл тустуунан дьарыктаммытым. Дьокуускай куорат күрэхтэһиитигэр «Спартак» обществоттан 48 кг тустар этим. Оччолорго Василий Гоголевтыын бииргэ дьарыктанар этибит. Кини Республика сүүмэрдэммит хамаандатын чилиэнэ этэ. Билигин Европа чемпиона, Советскай Союз 5 төгүллээх чемпиона, Советскай Союз спордун үтүөлээх маастара. Мин Василий Гоголевы кытта бииргэ эрчиллэ сылдьыбыппын күндүтүк саныыбын. 1979 с. училищены бүтэрэн кэлэн П-Заболоцкай совхозка рабочайынан үлэлээбитим. Ол кэмнэргэ күүскэ көҥүл тустуунан дьарыктаммытым. Оччолорго тыа сирин оройуоннара «Урожай» обществоҕа киирэллэрэ. Онон оройуон сборнайыгар киирэн «Урожай» обществоҕа күрэхтэһэрим. Тустууктары мунньан Бороҕоҥҥо дьарыктыыллар этэ. Онно Баатаҕайтан Соловьев Колялыын баран сборданар этибит. Ол кэмҥэ 1980 с. Дьокуускай куоракка көҥүл тустууга Бүтүн Союзтааҕы турнир буолбута. Онно кыттан 5 иһигэр киирэн аны Аан дойдутааҕы турнирга Улан-Удэҕа күрэхтэһэ барбытым. Ол турнирга кандидатскай нуорманы толорон көҥүл тустууга Советскай Союз спордун маастарыгар кандидат буолбутум. Соловьев Николай Петрович мин кэннибиттэн эмиэ көҥүл тустууга Советскай Союз спордун маастарыгар кандидат буолбута.
1981 с. «Найахы» совхоз спорт.инструкторынан үлэлээбитим. Ол үлэлиир кэммэр сайыҥҥы спартакиадаҕа совхоз оройуоҥҥа бастаабыта. Ол кэнниттэн ылбыт идэбинэн олох да үлэлээбэтҕ5им. 1982 с. «Найахы» совхозка сылгыһытынан үлэлии киирбитим. Онтон ыла күн бүгүҥҥэ диэри сылгыһыттыы сылдьабын.
Ситиһиилэрим:
— 1979 с. 48 кг Уус-Алдан оройуонун чемпиона;
— «Найахы» уонна П-Заболоцкай аатынан совхозтар көҥүл тустууга 6 төгүллээх чемпиона;
— «Найахы» уонна П-Заболоцкай аатынан совхозтар хапсаҕайга 4 төгүллээх чемпиона;
— 1979 с. П-Заболоцкай аатынан совхозка «За красивую схватку», 1981, 1982, 1983 сс. «Найахы» совхозка «За лучшую технику» анал ааттар хаһаайыннара буолбутум.
Наҕараадаларым:
— Республиканскай ФСО «Урожай» общество Бочуотунай Грамотата;
— «Почетный работник ФСО «Урожай»» анал бэлиэлээхпин;
— Баатаҕай нэһилиэгэр «Н.Н.Тарскай аатынан физическэй культураҕа уонна спортка сайдыытыгар кылаатым иһин» анал бэлиэлээхпин.
Ахтыыны оҥордо спорт ветерана Михаил Петрович Белолюбскай,
2022 с. Баатаҕай нэһилиэгэ
БИБЛИОГРАФИЯ
Кинигэлэр
- Ефимов Д.А. Төрөөбүт түөлбэбит Баатаҕай / Д. А. Ефимов. – Дьокуускай: Көмүөл, 2007 – 78 с.
- Румянцева К. И. Ахтар-саныыр үөрэҕим кыһата: [Н. Н. Тарскай аатынан Баатаҕай орто оскуолата] / К. И. Румянцева. – Дьокуускай: Издатель Э.Т. Пономарев, 2020. – 308 с.
Периодическай бэчээккэ
- Жиркова О. Мүрүгэ – Дьөһөгөй оҕотун сүүрүүтэ: [Баатаҕайтан Мээчик дмэн ат төрдүһүнэн кэлбит. Хаһаайына- Михаил Белолюбскай]/ О. Жиркова // Илгэ №2. – 2007. – С. 46-47.
- Сезоннааҕыны толордулар: [Белолюбскай М. П. көлө-илии звенота] // Ленинскэй тэрийээччи. – 1985. – Атырдьах ыйын 20 к. – С. 1.
- Сивцев В. В. Баатаҕай сылгыһыттара / В. В. Сивцев // Мүрү саһарҕата. – 2005. – Тохсунньу 29 к. – С. 1
- Сивцев В. Идэтигэр бэриниилээх / В. Сивцев // Мүрү саһарҕата. – 2012. – Муус устар 4 к.
- Сивцев В. Олох, үлэ үөһүгэр: [Белолюбскай М. П. туһунан] / В. Сивцев // Мүрү саһарҕата. – 2005. – Муус устар 26 к.
- Сивцев В. Оттуур санаа күүстээх / В. Сивцев // Мүрү саһарҕата. – 2005. – От ыйын 12 к. – С. 3.
