 |
|
 |
 |
 |
 |
Улуу Кыайыы 81 сылын көрсө Баатаҕай нэһилиэгин култууратын үлэһиттэрэ ыам ыйын 5-6 күннэригэр сэрии сылын оҕотугар Готовцева Татьяна Петровнаҕа, анал байыаннай дьайыы кыттыылааҕын дьиэ-кэргэнигэр Корниловтарга мас хайытыытыгар, саһааннааһыныгар, дьиэ таһын хомуйууга субботниктары тэрийдибит.
Улуу Кыайыы өрөгөйдөөх 81 сылын көрсө, Саха сиригэр национальнай байыаннай оскуола тэриллибитэ 100 сылыгар олохтоох библиотекаҕа биир дойдулаахпыт, артиллерист-офицер, Аҕа дойду сэриитин кыттыылааҕа Петр Егорович Матвеевка аналлаах "Үтүө киһи аата үйэлээх", историческай наука кандидата, саха норуота Аҕа дойду сэриитигэр кыттыытын үөрэппит ученай Дмитрий Дмитриевич Петровка "Историк-фундаменталист Дмитрий Петров" быыстапкалар турдулар. Быйыл Петр Егорович төрөөбүтэ 110, Дмитрий Дмитриевич 105 сыллара.
Саха Өрөспүүбүлүкэтэ буолбуппут 104 сылыгар Баатаҕай нэһилиэгэр орто оскуола үөрэнээччилэригэр "Таптыыр дойдум - Саха сирэ" диэн библиотечнай уруок ыытылынна. Өрөспүүбүлүкэбит төрүттэниитин, кимнээх турууласпыттарын, сүрүн символларын, сирин-уотун, баайын, бастакы президеммит М.Е. Николаев тустарынан сиһилии билистилэр. Бу күн сахалыы саҥаны үрдүктүк тутан уруокка бары ийэ тылбытынан кэпсэттибит, "Мин кимминий?" остуол оонньуутун оонньоотубут.
Муус устар 18 күнүгэр Бүтүн Россиятааҕы Библионочь - 2026 дойдубут үрдүнэн араас хабааннаахтык ыытылынна. Быйылгы тэрээһин Россия норуоттарын сомоҕолоһууларын сылын чэрчитинэн тэрилиннэ. Баатаҕай нэһилиэгэр бу тэрээһини олохтоох библиотекаҕа уонна оскуолаҕа ыыттыбыт. Оскуола алын кылаас оҕолоругар "Россия норуоттарын остуоруйаларынан айан" квиз оонньуу ыытылынна. Икки хамаандаҕа арахсан норуоттар сүрүн атрибуттарын, таабырыннары таайыыга, остуоруйалар геройдарын, сөптөөх эппиэттэри булууга, бутуурдаах боппуруостары бэрээдэктээһиҥҥэ күөн көрүстүлэр.